La demiscions dla Talia dala union a trëi cun la Monarchia Austro-ungareja y l Rëni Tudësch, l mudamënt de bandiera de viers dla Entente y la detlarazion de viera, ti à ala Talia custà 600.000 morc y 900.000 nvalic de viera. Chësc fova l priesc cruënt che la Talia dassova paië da gën per chësta viera d’agrescion per pudëi fé pea canche la jiva de spartì ora i raions tëuc ite sun la costes dl’Adria y a nord sun l cunfin cun l prinzipat dl Tirol.
Riesc do St. Germain fovel unì a se l dé l’anescion dl Südtirol ala Talia; n at che jiva contra l dërt di populi. L PROBLEM – SÜDTIROL fova nasciù. Bën prësc ova l ‚Duce’ spiculà ora l putenziel de lita di veterans per renfurzé si putënza tl Südtirol, tla Libia, coche nce te d’autri raions dl’ Africa Orientale Italiana y ova dal 1926 mpo lascià fé su te duta la Talia dl nord aricëul de gran ciastiei di morc.
L’ ultima capeles dai osc ie unides fates su tl 1939 tl Südtirol – a Burgeis, a Gossensass y a Sanciana -, scebën che l ne fova tlo mei unì cumbatù. Chësc „lim de saudeies morc“ dassova giustifiché l’anescion di sudtirolesc y di ladins dla Dolomites. A dì la urità fova i saudeies che i ova suplì tlo, tumei sun na front scialdi dalonc y fova plu tert unic menei tlo ca per i suplì‚ politicamënter de uega, mo n iede: na fauzificazion storica ora de mesura. Ma la storia cuntemporana ne perdona deguna baujies, ëila les fej unì a lum zënza remiscion.
Traduzion dal tudësch & usc : Rut Bernardi

La demiscions dla Talia dala union a trëi cun la Monarchia Austro-ungareja y l Rëni Tudësch, l mudamënt de bandiera de viers dla Entente y la detlarazion de viera, ti à ala Talia custà 600.000 morc y 900.000 nvalic de viera. Chësc fova l priesc cruënt che la Talia dassova paië da gën per chësta viera d’agrescion per pudëi fé pea canche la jiva de spartì ora i raions tëuc ite sun la costes dl’Adria y a nord sun l cunfin cun l prinzipat dl Tirol.
Riesc do St. Germain fovel unì a se l dé l’anescion dl Südtirol ala Talia; n at che jiva contra l dërt di populi. L PROBLEM – SÜDTIROL fova nasciù. Bën prësc ova l ‚Duce’ spiculà ora l putenziel de lita di veterans per renfurzé si putënza tl Südtirol, tla Libia, coche nce te d’autri raions dl’ Africa Orientale Italiana y ova dal 1926 mpo lascià fé su te duta la Talia dl nord aricëul de gran ciastiei di morc.
L’ ultima capeles dai osc ie unides fates su tl 1939 tl Südtirol – a Burgeis, a Gossensass y a Sanciana -, scebën che l ne fova tlo mei unì cumbatù. Chësc „lim de saudeies morc“ dassova giustifiché l’anescion di sudtirolesc y di ladins dla Dolomites. A dì la urità fova i saudeies che i ova suplì tlo, tumei sun na front scialdi dalonc y fova plu tert unic menei tlo ca per i suplì‚ politicamënter de uega, mo n iede: na fauzificazion storica ora de mesura. Ma la storia cuntemporana ne perdona deguna baujies, ëila les fej unì a lum zënza remiscion.
Traduzion dal tudësch & usc : Rut Bernardi